Кошаркарите на ТФТ Скопје постигнаа голем успех пласирајќи се во полуфиналето од плеј-офот во АБА 2 лига. Во решавачкиот трет натпревар од четвртфиналето, тимот предводен од тренерот Боро Смилковски славеше на гостувањето кај Златибор Моцарт со 90:80.
Со оваа победа, скопскиот состав ја доби серијата со 2-1 и обезбеди полуфинален дуел против Сутјеска.
ТФТ одлично го отвори натпреварот и уште по првата четвртина стекна двоцифрена предност (28:15). Домаќините возвратија во вториот период и до паузата ја намалија разликата на само два поени (38:36). Во третата четвртина се водеше израмнета борба, со чести промени на водството, па Златибор во последните десет минути влезе со минимална предност од 59:57.
Во решавачкиот период, македонскиот тим покажа квалитет и зрелост. И покрај проблемите со лични грешки на Џастин Гордон, ТФТ имаше силен придонес од клупата и направи клучна серија со која ја презеде контролата врз резултатот. Во финишот, искуството и смиреноста беа пресудни за сигурна победа од 90:80.
Најефикасен во редовите на ТФТ беше Дарин Говенс со 23 поени, 7 скока и 8 асистенции. Значаен придонес даде и Ѓорѓи Зафиров со 14 поени и 6 скока, додека Виктор Ташовски и Михаил Стојанов постигнаа по 13 поени, при што Стојанов имаше максимален учинок од игра. Кај домаќините, најпрецизен беше Матеј Чибеј со 16 поени.
Полуфиналната серија против Сутјеска, која се игра до две победи, започнува на 8 април во Никшиќ. Реваншот е закажан за 15 април во Скопје, додека евентуалната мајсторка би се одиграла на 22 април повторно во Црна Гора.
МОЖЕБИ ЌЕ ВЕ ИНТЕРЕСИРА:
