Министерот за внатрешни работи Панче Тошковски, по повод 7 Мај – Денот на македонската полиција, изјави дека во услови на сложени безбедносни предизвици, полицијата има клучна улога во заштитата на сигурноста и довербата на граѓаните.
Тој посочи дека во изминатиот период е забележан пад на вкупниот криминалитет за повеќе од шест проценти, оценувајќи дека државата покажала сериозен капацитет во справувањето со криминалот.
Според податоците на Министерство за внатрешни работи, криминалитетот во земјата е на најниско ниво во последните две децении. Ефикасноста во работењето на полицијата достигнала 67,2 проценти, што, според министерот, претставува најдобар резултат во изминатите 20 години.
Тошковски нагласи дека бројките не се само статистика, туку доказ дека институциите нема да отстапат пред криминалот и дека законите мора да важат подеднакво за сите.
Во текот на изминатата година, како што информираше, биле разбиени 16 организирани криминални групи во кои биле инволвирани 205 лица. Во делот на борбата против корупцијата биле реализирани повеќе постапки за случаи од висок профил, при што биле сузбиени и четири криминални групи.
Според министерот, овие резултати покажуваат дека институциите повторно ја зацврстуваат својата улога и капацитет во борбата против криминалот и корупцијата.
МОЖЕБИ ЌЕ ВЕ ИНТЕРЕСИРА:
