Брегалница Штип е многу блиску до враќање во Првата македонска фудбалска лига, откако во дербито на сезоната одигра 1-1 против Шкендија Арачиново на домашен терен во Штип.
Гостите први стигнаа до предност преку Шаркоски во 16. минута, додека Брегалница до израмнување дојде во второто полувреме. Капсаров во 67. минута беше сигурен од белата точка и ги постави конечните 1-1.
Натпреварот беше исклучително тензичен и на моменти на раб на инцидент, особено по досудениот пенал за домашниот тим. По израмнувачкиот погодок дојде до немили сцени и прекин на мечот, а интервенираше и полицијата. Прекинот траеше околу десет минути, по што натпреварот продолжи.
Во завршницата Брегалница имаше неколку можности и за целосен пресврт, но не успеа да ги реализира шансите.
Со ова реми, Брегалница остана лидер на табелата заедно со Скопје, откако двата тима сега имаат по 65 бодови. Шкендија Арачиново останува трета со 63 бодови и моментно е на позицијата која води во баражот за влез во елитата.
До крајот на сезоната штипјани ги очекуваат дуели против Осогово и Победа, а со две победи ќе обезбедат директен пласман во Првата лига.
Скопје освои важни бодови на гостувањето кај Тетекс, славејќи минимално со 0-1 во натпревар со мал број шанси, но големо резултатско значење.
Кожуф одигра убедлив натпревар на домашен терен и со високи 8-0 ја декласира Победа во целосно еднострано соочување.
Охрид останува во трка за бараж, откако пред својата публика сигурно го совлада Големо Коњари со 3-0.
Детонит Плачковица без проблеми ја победи веќе испаднатата Преспа со 3-0, контролирајќи го мечот од почетокот до крајот.
Саса стигна до минимална, но значајна победа од 1-0 против Слога Виница.
Во Неготино, Вардар доживеа тежок пораз на домашен терен, губејќи убедливо со 0-4 од Осогово.
МОЖЕБИ ЌЕ ВЕ ИНТЕРЕСИРА:
