Лука Модриќ е сè поблиску до крајот на својата богата фудбалска кариера, откако шпанските и италијанските медиуми објавија дека хрватскиот капитен сериозно размислува за пензионирање по Светското првенство.
Според весникот „АС“, повикувајќи се на италијански извори и новинарот Николо Скира, големо влијание врз одлуката на Модриќ имал неуспехот на Милан да избори пласман во Лигата на шампионите. Настапот во елитното европско натпреварување бил еден од главните услови за негово останување во клубот.
Милан остана без место во Европа по поразот од Каљари, а италијанските медиуми тврдат дека токму по овој натпревар Модриќ побарал време за размислување околу својата иднина.
Иако клубот сакал да ја продолжи соработката и за следната сезона, сè погласни се шпекулациите дека искусниот играч за врска е поблиску до одлука да стави крај на кариерата. Неговиот договор со Милан наскоро истекува, а клубот ја очекува неговата конечна одлука.
Според најавите, Модриќ треба да се изјасни во следните денови, пред настапот со репрезентацијата на Хрватска на Светското првенство кое ќе се игра во САД, Канада и Мексико.
Хрватска ќе настапи во група со Англија, Панама и Гана, а многумина сметаат дека тоа би можел да биде последниот голем турнир во кариерата на легендарниот хрватски фудбалер.
МОЖЕБИ ЌЕ ВЕ ИНТЕРЕСИРА:
