Манчестер Сити најави можност за судска постапка против Реал Мадрид, откако кандидатот за нов претседател на шпанскиот клуб, Енрике Рикелме, изјави дека доколку биде избран ќе ги доведе во Мадрид фудбалерите Ерлинг Халанд и Родри од редовите на англискиот шампион.
Рикелме, кој е противкандидат на актуелниот претседател Флорентино Перез на клупските избори, во телевизиско гостување се појави со дрес на Реал Мадрид со презимето на Халанд, дополнително поттикнувајќи шпекулации за негов можен трансфер.
„Тој има откупна клаузула и би сакал да дојде во Реал Мадрид. Доколку бидам избран за претседател, тој ќе игра за Реал Мадрид“, изјави Рикелме.
По овие наводи, таткото и агент на Халанд брзо ги демантираа тврдењата за негово заминување, а сега се огласи и Манчестер Сити со официјална реакција.
Од клубот наведуваат дека информациите кои се појавиле во Шпанија за иднината на Ерлинг Халанд се неточни и дека нема никаква клаузула која би овозможила таков трансфер.
„Приказните што се појавија во Шпанија во врска со иднината на Ерлинг Халанд се невистинити. Нема шанси ова да се случи и нема клаузула што би го дозволила тоа. Размислуваме да преземеме правни мерки поради користење фотографија на нашиот играч во овој контекст“, се наведува во соопштението на Манчестер Сити.
Изборите за претседател на Реал Мадрид ќе се одржат во недела.
МОЖЕБИ ЌЕ ВЕ ИНТЕРЕСИРА:
