Премиерот Христијан Мицкоски денеска ќе учествува на Самитот Европска Унија – Западен Балкан, кој се одржува во Тиват.
Според информациите од Владата, самитот се одржува во хотелот „Regent Porto Montenegro“, каде лидерите ќе разговараат за актуелните прашања поврзани со европската интеграција на земјите од регионот и за соработката со Европската Унија.
По завршувањето на самитот, во 15:30 часот е закажана заедничка прес-конференција во Naval Heritage Museum во Тиват.
На самитот му претходеше турнејата на претседателот на Европскиот совет, Антонио Кошта, кој во рамки на посетата на земјите од Западен Балкан се сретна со регионалните лидери, а денеска ќе биде копретседавач на состанокот во Тиват.
Кошта на 2 јуни беше во посета на Скопје, каде оствари средба со Мицкоски, по што беше одржана заедничка прес-конференција.
Тогаш премиерот порача дека Македонија останува цврсто определена кон европскиот пат, без барање привилегии, туку со инсистирање на принципиелен, кредибилен и предвидлив процес во кој реформите и исполнетите обврски ќе бидат вистински вреднувани.
Мицкоски истакна дека во изминатиот период се работи на реформската агенда, зајакнување на институциите, стабилизирање на економијата, привлекување инвестиции и подобрување на јавните услуги.
Тој нагласи дека европската интеграција не е само политичка тема, туку процес кој значи подобро образование, здравство, институции и повисок животен стандард за граѓаните.
Премиерот додаде дека Европа е најсилна кога покажува визија, храброст и доследност кон сопствените вредности, како и дека достоинството, идентитетот и принципиелноста не треба да бидат пречка за европската перспектива.
Од своја страна, Кошта повтори дека усвојувањето на договорените уставни измени останува клучен услов за формален почеток на пристапните преговори со Европската Унија.
Тој нагласи дека најголемиот напредок во процесот се постигнува преку конструктивен дијалог со соседите, спроведување реформи и исполнување на преземените обврски, истакнувајќи дека процесот се базира на заслуги.
Во рамки на својата турнеја, Кошта ги посети и Сараево, Тирана, Приштина, Белград, а ја заврши во Црна Гора, каде денеска копретседава со самитот. Главна тема на состанокот е „Заеднички просперитет и стабилност на Европската Унија и Западен Балкан“.
МОЖЕБИ ЌЕ ВЕ ИНТЕРЕСИРА:
