ВМРО-ДПМНЕ денеска упати серија обвинувања кон СДСМ, тврдејќи дека во периодот на нивното владеење институциите биле злоупотребувани за лични и партиски интереси.
Од владејачката партија посочуваат дека најновите сомнежи се поврзани со поранешниот директор на Царинска управа, Стефан Богоев, за кого тврдат дека примил мито поврзано со тендер за одржување на хигиената на граничните премини и терминали.
Според ВМРО-ДПМНЕ, наводната исплата од 2.000 евра не била единствена, туку претставувала дел од повеќе исплати кои, како што велат, требало да следуваат во рамки на истиот случај.
Партијата тврди дека постоела директна комуникација меѓу Богоев и лицето Александар Спирковски, познат како Џемо, кој според нивните наводи бил поврзан со фирмата што го добила тендерот вреден 18 милиони денари.
Од ВМРО-ДПМНЕ бараат целосно расчистување на случајот и одговор на прашањето колкава била вкупната сума што наводно требало да биде исплатена во врска со оваа јавна набавка.
Во соопштението, владејачката партија упати и дополнителни критики кон СДСМ, оценувајќи дека случајот е уште еден пример за, како што наведуваат, коруптивни практики во времето на нивното управување со институциите.
СДСМ засега нема официјална реакција на последните обвинувања изнесени од ВМРО-ДПМНЕ.
МОЖЕБИ ЌЕ ВЕ ИНТЕРЕСИРА:
