Англија избори пласман во четвртфиналето на Светското првенство, откако во драматичен натпревар го совлада домаќинот Мексико со 3:2 на легендарниот стадион „Ацтека“.
Прво име на натпреварот беше Џуд Белингем, кој со два гола во првото полувреме ѝ обезбеди убедлива предност на англиската репрезентација. Сепак, Мексиканците не се предадоа и преку Хулијан Кињонес намалија пред заминувањето на одмор.
Возбудувањата продолжија и во вториот дел. Англија остана со десет фудбалери, откако Џарел Кванса доби директен црвен картон по интервенција на ВАР.
И покрај играчот помалку, Англичаните добија пенал, а Хари Кејн беше сигурен реализатор за водство од 3:1.
Мексико повторно се врати во игра кога по ВАР-проверка доби удар од белата точка, а Раул Хименез ја намали разликата на 3:2.
Во преостанатиот дел од натпреварот домаќинот силно притискаше во потрага по израмнување, но Англија успеа да го сочува водството и покрај долгото судиско продолжение.
Со оваа победа Англија обезбеди место во четвртфиналето, каде што ќе игра против Норвешка, која претходно приреди сензација елиминирајќи го Бразил. Натпреварот е закажан за 11 јули во Мајами.
Дуелот во Мексико Сити започна со едночасовно задоцнување поради силно невреме, а англиските фудбалери мораа да се справат и со тешките услови за игра на надморска височина од околу 2.200 метри.
Со триумфот Англија стави крај на импресивната серија на Мексико на стадионот „Ацтека“, каде што домаќинот никогаш претходно немаше пораз на натпревар од Светско првенство.
МОЖЕБИ ЌЕ ВЕ ИНТЕРЕСИРА:
