Македонската кошаркарска репрезентација ја заврши првата фаза од претквалификациите за Европското првенство 2029 со максимален ефект, откако на гостински терен го совлада Луксембург со 80-66 и ја забележа шестата победа во исто толку натпревари.
Иако пласманот во следната рунда беше обезбеден уште пред овој натпревар, селекторот Жозеп Марија Берокал настапи со комбиниран состав. Андреј Јакимовски не беше во тимот, додека капитенот Војдан Стојановски не доби минутажа.
Можност добија повеќе млади кошаркари и играчи со помала минутажа, а успешен дебитантски настап имаше и натурализираниот кошаркар Нејт Сестина, кој веднаш остави силен впечаток.
Македонија уште од почетокот го контролираше натпреварот. По водството од 18-9 во првата четвртина, следуваше одлична игра во вториот период, кога македонските кошаркари стигнаа и до највисоки 19 поени предност (46-27) на полувремето.
Во третата четвртина Луксембург успеа да ја намали разликата на десет поени, но Македонија брзо ја врати контролата и не дозволи противникот сериозно да се доближи до крајот на мечот.
Најефикасен во македонскиот состав беше дебитантот Нејт Сестина со 18 поени. Виктор Ташовски постигна 16 поени, седум скока и седум асистенции, Стојан Ѓуроски реализираше 13 поени, а Валмир Какруки и Виктор Ефремовски натпреварот го завршија со по 12 поени.
Македонија втората фаза од претквалификациите за Европското првенство 2029 ќе ја започне кон крајот на август, а противниците ќе ги дознае на ждрепката закажана за 15 јули во Минхен.
МОЖЕБИ ЌЕ ВЕ ИНТЕРЕСИРА:
