Грчките власти распоредија дополнителни противпожарни сили за гаснење на голем шумски пожар што избувна во близина на селото Инои, во општината Мандра-Идилија во западна Атика, додека жителите се повикани на зголемена претпазливост.
Според грчката противпожарна служба, пожарот избувнал кратко пред 15:30 часот во земјоделско-шумска област Сфака и брзо се проширил кон борова шума во близина на станбени објекти.
Во гаснењето се ангажирани 140 пожарникари, шест пешадиски тимови, волонтери и 34 противпожарни возила.
Од воздух интервенираат осум авиони и четири хеликоптери, од кои еден се користи за координација на операцијата.
Пожарните сили на терен се поддржани и од цистерни и градежна механизација од регионот Атика, а специјализиран тим со беспилотни летала го следи ширењето на огнената стихија.
Системот за итни известувања 112 испратил порака до жителите во 16:22 часот, со препорака да останат во готовност и да ги следат инструкциите од надлежните служби.
Поради пожарот, сообраќајот е привремено прекинат на повеќе делници од стариот пат Атина–Теба, вклучително и правците кон Елефсина, Вилија и Теба.
Центарот за цивилна заштита ја следи состојбата во реално време преку снимки од беспилотни летала со оптички и термовизиски камери.
На терен е испратен и тим за истрага на можен подметнат пожар, кој ги истражува причините за избувнувањето на огнот.
МОЖЕБИ ЌЕ ВЕ ИНТЕРЕСИРА:
