Основното јавно обвинителство за гонење организиран криминал и корупција ја прошири истрагата за случајот со нелегален увоз, дистрибуција и апликација на медицински лекови и помагала, во јавноста познат како случајот со ботоксите. Со најновата истрага се опфатени уште четири лица.
По наредба на Обвинителството, вчера беше спроведена координирана акција во која беа извршени претреси на пет локации во Скопје, меѓу кои и две здравствени установи. Во акцијата се приведени три лица, вклучително и двајца лекари.
Од Обвинителството информираат дека тројца од новоосомничените се гонат за кривичните дела „злосторничко здружување“ и „повреда на права од индустриска сопственост и неовластена употреба на туѓа фирма“, додека четвртото лице е осомничено за „повреда на права од индустриска сопственост и неовластена употреба на туѓа фирма“.
По предлог на надлежниот јавен обвинител, судија на претходна постапка при Основниот кривичен суд Скопје на сите четворица осомничени им изрече мерки на претпазливост.
Случајот беше отворен во април годинава, кога беше донесена наредба за спроведување истражна постапка против 17 физички и шест правни лица. Според Обвинителството, постои основано сомнение дека тие биле инволвирани во кривичните дела „злосторничко здружување“, „повреда на права од индустриска сопственост и неовластена употреба на туѓа фирма“ и „примање поткуп“.
Од Обвинителството посочуваат дека истрагата продолжува со цел целосно расчистување на случајот и утврдување дали во незаконските активности биле вклучени и други лица.
МОЖЕБИ ЌЕ ВЕ ИНТЕРЕСИРА:
