По силното невреме што ја зафати земјата, времето и денеска ќе биде променливо и нестабилно. Според прогнозата на Управата за хидрометеоролошки работи (УХМР), се очекуваат сончеви периоди, но и локална појава на пороен дожд, грмежи, засилен ветер и услови за изолирано невреме проследено со град.
Ќе дува слаб до умерен северен ветер, кој долж Повардарието повремено ќе биде засилен. Во западните делови од државата ќе преовладува слаб до умерен западен ветер, со повремени засилувања.
Утринските температури ќе се движат од 10 до 20 степени, додека дневните ќе достигнат од 27 до 32 Целзиусови степени.
Во Скопје времето ќе биде променливо облачно со сончеви периоди, а во одделни делови од котлината се очекува локална нестабилност проследена со пороен дожд, грмежи и засилен ветер. Минималната температура ќе се спушти до 17 степени, а максималната ќе достигне околу 31 степен.
Од УХМР најавуваат дека нестабилното време ќе продолжи и во наредните денови. До петок ќе има променлива облачност, повремени врнежи од дожд и грмежи, а се очекува и значително намалување на дневните температури.
МОЖЕБИ ЌЕ ВЕ ИНТЕРЕСИРА:
