Означувајќи го крајот на една ера, властите на Њујорк неделава ги отстранија речиси сите телефонски говорници во градот, кои станаа „технолошки жртви“ на сеприсутноста на бесплатниот интернет и паметните телефони во последниве години.
Покрај практичната намена, телефонските говорници со десетлетија се појавуваа и во поп-културата – од стрипови до холивудски блокбастери и ТВ-серии. Но, обожавателите на Супермен, на пр., ќе се утешат со фактот дека Менхетн ќе задржи четири говорници. Познатите „пресоблекувалници“ на стрип-јунакот Кларк Кент – „Човек од челик“, ќе бидат зачувани како потсетници на не толку далечното минато.
Градоначалникот на Менхетн, Марк Левин, во коментар на „Твитер“ нагласи дека сѐ уште чувствува носталгија кон говорниците.
– Тоа е крај на една ера. Последните три телефонски говорници на плоштадот Тајмс сквер се отстранети. Нема веќе „ловење“ парички по вашите џебови – напиша Левин на „Твитер“.
Но, се надеваме дека ова е и почеток на нова ера, со поголема правичност во пристапот до технологијата, додава подолу Левин, имајќи предвид на населбите во северен Менхетн, како што е Харлем, кои се помалку покриени со телефонски и интернет-мрежи.
