Гласањето во парламентот за откажувањето на кандидатурата за премиер на Бугарија на Пламен Николов ќе се одржи утре, беше одлучено на состанокот на вториот вонреден совет на координаторите на пратеничките групи, пренесува БГНЕС.
Гласањето ќе биде прва точка на дневниот ред на утрешната седница на Народното собрание на Бугарија. Николај Хаџигенов, од „Стани БГ! Доаѓаме!”, вели дека нема да му биде дозволено на Николов со сила да дојде на функцијата премиер.
„Донесена е одлука за која утрово го искажавме нашето мислење. Мора да има конечен чин на состанокот, мора да биде донесена одлука и мора да се гласа. Сега ова е наш натпревар, топката е во наши раце. Не можеме да избегаме од одговорноста да ја финализираме постапката “ рече Хаџигенов.
Десислава Атанасова од ГЕРБ изјави дека откако ќе се гласа за повлекувањето на Пламен Николов, постапката за првиот мандат ќе заврши и вториот мандат ќе биде предаден. Таа најави дека предлогот за нацрт-одлука ќе го поднесе „Има такви луѓе”.
Лидерот на ГЕРБ, Бојко Борисов, изјави дека неговата партија ќе предложи влада со Даниел Митов како кандидат за премиер на Бугарија, пренесува БГНЕС.
Според Борисов во Бугарија владее хаос. Во неа има неуспех во економијата, здравството, енергетиката и во многу други важни области од социјалниот и економскиот живот.
Тој повтори дека ГЕРБ не се виновни за другите партии и за нивниот неуспех во формирањето на владата.
Тој побара сите политички партии да се почитуваат едни со други.
„Со омраза и навреди ништо добро не се случува“ изјави Борисов обраќајќи им се на политичките лидери во земјата.
„Два месеци создавате илузија дека ќе формирате влада. Ако имате мнозинство, решете ги сите прашања како што сакате. Не гледам како ќе ги натерате Бугарите повторно да излезат на избори, особено кога во позадина е очекуваниот бран на коронавирусот“ додаде тој.
Тој ја обвини актуелната влада за неуспех во кампањата за вакцинацијата.