Благодарение на брзата реакција на полициските службеници од СВР Тетово, спречен е обид за разбојништво во угостителски објект во градот, а осомничениот е приведен кратко по инцидентот.
Според информациите од Министерството за внатрешни работи, на 3 јуни околу 16 часот на улицата „Илинденска“ во Тетово бил лишен од слобода 22-годишниот Х.Д. од Тетово. При извршениот преглед кај него бил пронајден и одземен гасен пиштол.
Полициските проверки покажале и дека лицето било под дејство на алкохол, при што алкотестирањето регистрирало 1,35 промили алкохол во крвта.
Претходно, околу 15:30 часот, во СВР Тетово било пријавено дека во угостителски објект во градот е извршен обид за разбојништво. Според пријавата, осомничениот влегол во објектот и со закана со пиштол побарал да му бидат предадени парите од дневниот промет.
Вработениот А.И. (38) од Тетово одбил да ги предаде парите и побарал напаѓачот да го напушти локалот. По ова меѓу двајцата настанала физичка пресметка, при што осомничениот го удрил вработениот во пределот на главата со кундакот од пиштолот.
По инцидентот, напаѓачот избегал од местото на настанот, но по преземените оперативни мерки и активности од страна на полицијата бил брзо лоциран и приведен.
Од Министерството за внатрешни работи информираат дека се преземаат дополнителни мерки за целосно расчистување на случајот, по што ќе следува соодветен поднесок против осомничениот.
МОЖЕБИ ЌЕ ВЕ ИНТЕРЕСИРА:
