Пожарот во кавадаречко и вечерва останува активен, а поради големата зафатена површина и непристапниот терен, засега не може да биде ставен под контрола.
Според директорот на Дирекцијата за заштита и спасување, Стојанче Ангелов, огнената стихија зафатила претежно нискостеблеста шума и вегетација, додека силниот пламен што повремено се појавува е резултат на согорувањето на голем број ниски смреки.
Ангелов, кој во текот на целиот ден беше на терен со противпожарните екипи, информира дека пожарникарите од Кавадарци ќе продолжат со интервенцијата и во текот на ноќта. На терен е и градоначалникот Митко Јанчев, кој се вклучил во активностите за гаснење на пожарот.
Во меѓувреме, Центарот за управување со кризи соопшти дека на територијата на општина Кавадарци се регистрирани уште два нови пожари.
Едниот е кај селото Камен Дол, во близина на каменоломот „Градба промет“, каде што гори нискостеблеста шума и сува трева. Вториот пожар е меѓу селата Цирково и Манастирец, каде што постои опасност огнот да се прошири и да прерасне во поголем пожар.
Надлежните служби остануваат на терен, а состојбата континуирано се следи.
МОЖЕБИ ЌЕ ВЕ ИНТЕРЕСИРА:
