Институт за јавно здравје уверува дека во моментов нема опасност од појава на хантавирус во Македонија и дека не постои непосреден ризик за граѓаните, изјави директорката Марија Андоновска.
Таа посочи дека Секторот за епидемиологија при ИЈЗ секојдневно комуницира со Светска здравствена организација и со Европскиот центар за контрола на болести, од каде постојано добива информации и насоки за евентуално постапување.
Андоновска објасни дека хантавирусот не е нов и дека постојат два типа – европско-азиски, кој предизвикува ренални симптоми, и американски тип, поврзан со респираторни симптоми, кој неодамна бил регистриран на крузер во Атлантскиот Океан.
Таа нагласи дека според информациите од СЗО, на бродот немало македонски државјани, ниту меѓу патниците, ниту меѓу екипажот.
Иако во земјава моментално нема регистрирани случаи од овој тип на вирус, Андоновска апелираше граѓаните да одржуваат високо ниво на хигиена и да бидат внимателни со храна што долго време стоела во магацини или на отворено.
Посебно предупреди на производи како семки, сончоглед и конзервирана храна, кои потенцијално би можеле да бидат контаминирани од глодачи. Воедно, посочи дека е важно општините редовно да ја спроведуваат задолжителната дератизација.
Според податоците на ИЈЗ, европско-азискиот тип на хантавирус во Македонија првпат бил дијагностициран во 2015 година, а досега биле регистрирани 32 случаи, од кои три завршиле со смртен исход.
Андоновска потсети и на епидемијата во Гостиварско во 2018 година, кога луѓе се заразиле од глодачи на бачило, нагласувајќи дека овој тип вирус не се пренесува од човек на човек.
Таа уверува дека ИЈЗ располага со потребната опрема, кадар и реагенси за евентуално справување со ситуацијата и додава дека ова не е вирус со карактеристики како ковид-19.
Во меѓувреме, Светска здравствена организација соопшти дека на бродот „МВ Хондиус“ на Атлантикот се потврдени пет случаи на зараза со хантавирус, додека уште неколку случаи се под истрага.
МОЖЕБИ ЌЕ ВЕ ИНТЕРЕСИРА:
