Барселона е нов шампион на Шпанија, откако синоќа на „Камп Ноу“ го победи Реал Мадрид со 2-0 во големото Ел Класико и математички ја обезбеди титулата во Ла Лига. Каталонците до шампионскиот пехар стигнаа токму против својот најголем ривал, во натпревар кој имаше и силна емотивна тежина за тренерот Ханси Флик, чиј татко починал непосредно пред дуелот.
Барселона го реши натпреварот уште во првите дваесет минути. Во деветтата минута Маркус Рашфорд со одличен слободен удар го совлада Тибо Куртоа и донесе водство од 1-0. Само девет минути подоцна, Дани Олмо одлично проигра зад одбраната на Реал, а Феран Торес без проблем ја испрати топката во мрежата за 2-0.
Реал Мадрид се обиде да се врати во натпреварот, но не успеа да ги искористи шансите. Гонзало Гарсија пропушти голема можност во првото полувреме, додека Куртоа спречи Рашфорд да постигне уште еден погодок пред паузата.
Во второто полувреме темпото се намали, а нервозата на теренот се зголеми. Во 50-тата минута дојде до турканица меѓу играчите, по што жолти картони добија Раул Асенсио и Дани Олмо. Реал накратко се израдува на погодок на Џуд Белингам во 63-тата минута, но голот беше поништен поради офсајд.
До крајот Барселона рутински го контролираше мечот, а трибините на „Камп Ноу“ беа во еуфорија со скандирањата „Шампиони, шампиони“. По последниот судиски свиреж следуваше големо славје на играчите и навивачите на каталонскиот клуб.
МОЖЕБИ ЌЕ ВЕ ИНТЕРЕСИРА:
