За околу една третина се намалил бројот на новозаразени и на починати лица од корона вирусот минатата недела во Македонија, соопшти денеска Инстотутот за јавно здравје. Во анализата која што го опфаќа периодот од 28 февруари од 6 март, споредено со претходната седмица, се наведува дека регистрирани биле 2.504 нови позитивни случаи на вирусот во 34 градови од државата.
-Тоа е намалување од 32,5 отсто споредено со неделата претходно. Во истиот период регистрирани биле и 44 смртни случаи, што претставува намалување од 35,3 проценти, наведува ИЈЗ
Од ИЈЗ соопштија дека повеќе од половина од регистрираните случаи биле од Скопје (56,6 отсто), додека највисока неделна инциденца е регистрирана во Кавадарци, Скопје и Демир Капија.
Регистрирани се заболени лица во сите возрасни групи. Најзастапена е возрасната група на лица на возраст над 6 години (28,2 отсто), додека најмал број е регистриран кај возрасната група од 0-9 години (4,1 проценти). Во однос на претходната недела, се забележи намалување на бројот на заболени кај сите возрасни групи, со најзабележително намалување од 46,9 отсто во возрасната група од 0-9 години.
Од пријавените 44 починати лица 42 биле на возраст над 60 години, а по едно починато лице било регистрирано во возрасната група од 40-49 и 30-39 години. Во текот на минатата недела вкупно се пријавени 372 реинфекции, со намалување за 31,5 проценти во однос на претходната недела.
Од ИЈЗ информираат и дека заклучно со 05 март, вакцинирани се вкупно 871.082 лица со барем една доза на вакцина против Ковид-19. Комплетно вакцинирани (со две дози) се вкупно 850.803 лица, а со трета доза се вакцинирани 144.391 лица.
