Шок и скандал во Европскиот парламент вчера предизвика бугарскиот европратеник Ангел Џамбаски кој отпоздрави со нацистички поздрав. Тоа се случи во текот на дебатата за пресудата на Европскиот суд на правдата со која се критикува владеењето на правото во Унгарија и Полска. Џамбаски, кој е познат по своите негаторски ставови кон македонскиот идентитет и е дел од партијата на Красимир Каракачанов, се расправаше со италијанскиот европратеник Сандро Гоѕи по што во еден момент ја крена искружената десна рака со која салутираше во манирот на нацистите и ја напушити салата.
Сето ова најде на жестоки реакции во Европарламентот. Од парламентарната група Ренесанса, на која и припаѓа европратеникот Гоѕи, побараа интервенција од претседателката на Европарламентот Мецола.
Џамбаски претходно од говорницата ги нападна своите колеги во европарламентот и застана во одбрана на владејачките партии во Полска и Унгарија, пред да ја „поздрави“ потпретседателката на ЕП Пина Пичерно, која во тој момент претседаваше со пленарната сесија.
-Нема никогаш да се согласиме со вашата агенда, агендата на сите што сакаат да ја уништат Европа трансформирајќи ја во нешто друго. Да живеат Фидес, Качински, Бугарија, кажа Џамбаски.
Пичерно набрзо потоа твитна дека веднаш го осудила потегот на Џамбаски и побарала да биде санкциониран.
-Европскиот парламент е жив споменик на демократијата против варваризмот на нацифашизмот, напиша таа.
Џамбаски да биде санкциониран побара и Манфред Вебер, претседавачот на ЕПП, најголемата групација во европарламентот.
-Во име на Европските Народни партии, ова го осудувам најстрого можно. Ова е спротивност на сè што значи Европскиот парламент и бараме веднаш да бидат изречени санкции, твитна Вебер.
