Црна Гора вчера, на Меѓувладината конференција меѓу Црна Гора и Европската унија во Брисел, официјално го затвори преговарачкото Поглавје 32 – Финансиски надзор. Со тоа, земјата досега има затворено 13 од вкупно 33 преговарачки поглавја во процесот на пристапување кон Европската унија.
Европската комесарка за проширување Марта Кос потсети дека во декември 2025 година Црна Гора затворила пет поглавја и нагласи дека позитивната динамика продолжува и во 2026 година. Таа истакна дека годинава се одбележуваат 20 години од обновата на црногорската независност и оцени дека тоа нема да биде само година на прослава, туку и на засилен реформски ангажман.
„Ова е добар почеток на годината и Црна Гора е на пат до крајот на 2026 година да ги затвори сите преостанати поглавја“, порача Кос.
Црногорскиот премиер Милојко Спаиќ изјави дека брзината со која земјата ги затвора преговарачките поглавја е јасен доказ дека процесот на проширување на Европската унија е жив и релевантен. Тој изрази уверување дека Црна Гора има капацитет да ги затвори сите поглавја уште до крајот на оваа година.
„Оваа Меѓувладина конференција покажува дека на европскиот пат нема пречки и нема кратенки. Сè се постигнува со работа и реформи“, истакна Спаиќ.
Тој додаде дека Европската унија, во услови на глобална несигурност, останува столб на мирот, демократијата и владеењето на правото, нагласувајќи дека не постои поголем идеал од обединета Европа и дека Црна Гора самоуверено чекори кон таа цел.
Поглавјето 32 – Финансиски надзор се однесува на усвојување и примена на меѓународно признати стандарди во областа на јавната внатрешна финансиска контрола, надворешната ревизија и најдобрите практики на Европската унија. Целта е да се обезбедат дисциплина, транспарентност и отчетност при користењето на националните средства и средствата од ЕУ во целиот јавен сектор.
Од црногорската Влада претходно оценија дека затворањето на ова поглавје претставува значаен чекор напред на патот кон полноправно членство во Европската унија.
Црна Гора официјално ги отвори преговорите за членство во ЕУ на 29 јуни 2012 година и досега има затворено 13 поглавја, што претставува речиси 40 проценти од вкупниот број. Според проекциите на црногорските власти, земјата би можела да стане полноправна членка на Европската унија во 2027 година.
Црна Гора е и првата држава што преговара според новиот принцип на проширување, според кој клучните поглавја – Правосудство и темелни права и Правда, слобода и безбедност – се отвораат на почетокот, а се затвораат на самиот крај од преговарачкиот процес.
МОЖЕБИ ЌЕ ВЕ ИНТЕРЕСИРА:
