Со сослушување на сведоци предложени од Јавното обвинителство, денеска во судницата во „Идризово“ продолжува судскиот процес за пожарот во дискотеката „Пулс“ во Кочани.
На претходното рочиште сведочеа членови на бендот ДНК и гости кои ја преживеале трагедијата, опишувајќи што се случувало во ноќта на 16 март минатата година. Во пожарот тогаш загинаа 63 лица, а повеќе од 200 беа повредени.
Како сведок исказ даде придружниот вокал Ана Костадиновска. Таа на прашањата од Обвинителството и одбраната околу поставувањето и активирањето на прскалките изјави дека не знае кој ги местел, ниту пак некогаш видела кој ги поставува во клубовите каде што настапувала групата ДНК. Посочи дека можно е тоа да го правело техничко лице од клубот.
Говорејќи за моментот кога избувнал пожарот, Костадиновска наведе дека кратко по почетокот на настапот почувствувала топлина, по што вокалот Панчо ги повикал присутните да излезат. Сепак, според неа, во првиот момент многумина не сфатиле дека ситуацијата е сериозна.
Музичарот Горан Тонев, кој настапувал како надворешен соработник со бендот, изјави дека пиротехничките средства биле веќе поставени кога се качиле на бината, но дека не знае кој ги поставил ниту кој ги активирал. Тој сведочеше дека огнот се проширил многу брзо и дека просторот брзо се исполнил со густ чад.
Двајца преживеани гости изјавиле дека по активирањето на прскалките се запалил дел од таванот, по што настанала паника и стампедо кон излезите.
Судењето се одвива под засилени безбедносни мерки, во присуство на обвинетите, роднините на жртвите и јавноста. Постапка се води против повеќе од 30 физички и три правни лица за тешки дела против општата сигурност.
Процесот го води судијката Дијана Груевска-Илиевска, а Обвинителството го застапува тим од 15 јавни обвинители. Пожарот во дискотеката „Пулс“ избувна за време на настап на групата ДНК и се смета за една од најтешките трагедии во поновата историја на државата. Со денешното рочиште продолжува доказната постапка со сослушување нови сведоци.
МОЖЕБИ ЌЕ ВЕ ИНТЕРЕСИРА:
