Лекот „Фостер“, кој го користат пациентите со астма и хронична опструктивна белодробна болест (ХОББ), од крајот на јули ќе биде достапен без доплата, а осигурениците ќе плаќаат само 280 денари партиципација, најави директорот на Фондот за здравствено осигурување, Сашо Клековски.
Според него, лекот со генеричко име беклометазон/формотерол повеќе нема да се доплаќа околу 800 денари, а партиципацијата ќе биде намалена од досегашните 300 на 280 денари.
Клековски објасни дека по реакциите на граѓаните за повисоките цени, до привремено зголемување на доплатата дошло поради воведувањето на лекот „Блоцета“ на позитивната листа, кој е конкуренција на „Фостер“. Со тоа била намалена референтната цена, а разликата до пазарната цена ја покривале пациентите.
„Тоа предизвика привремено зголемување на трошокот за граѓаните поради разликата меѓу референтната и пазарната цена на лекот. Но, граѓаните наскоро ќе можат да го користат без доплата. Во изминатите две до три недели сме во активна комуникација со производителот на „Фостер“, кој ја прифати новата референтна цена. По продажбата на преостанатите залихи по старата цена, од периодот по 20 јули, а најдоцна до 1 август, лекот ќе биде достапен без доплата и со пониска партиципација од 280 денари“, изјави Клековски.
МОЖЕБИ ЌЕ ВЕ ИНТЕРЕСИРА:
