Невидена драма во Хернинг и реми што остава горчлив вкус. Македонската ракометна репрезентација одигра 29-29 против силната Португалија, резултат што тешко ќе биде доволен за пласман во главната рунда. Последниот натпревар од групната фаза Македонија ќе го одигра на 20 јануари против Романија.
Средбата почна охрабрувачки за избраниците на Кире Лазаров. Со цврста одбрана и сигурен голман, Македонија поведе со 4-2 во шестата минута, но не ја искористи шансата за повисока предност. Исклучувањето на Стојковиќ и техничка грешка овозможија Португалија брзо да израмни на 4-4.
Се играше израмнето, гол за гол, а Македонија до 13. минута имаше минимално водство. По недоразбирање во нападот, противникот поведе со 7-6, но Павле Атанасијевиќ израмни на 7-7. Во тие моменти следуваше нов удар за нашиот тим – Никола Маркоски доби црвен картон, а селекторот Лазаров веќе претходно остана без Џонов и Петар Атанасијевиќ поради повреди.
И покрај тоа, Македонија продолжи рамноправно. Кузмановски од седум метри донесе водство од 10-9, но во завршницата на првото полувреме следуваше пад во нападот. Португалија го искористи тоа и поведе со 12-14, а серијата продолжи и по паузата за највисоки +5 (13-18).
И кога изгледаше дека мечот оди во еден правец, Македонија покажа карактер. Со подобра одбрана, голови на Павле Атанасијевиќ и Стојковиќ и важни интервенции на Митревски, разликата почна да се топи. Во 40. минута беше 17-22, а неколку минути подоцна веќе 20-22.
Клучниот момент дојде по 50. минута. На крилјата на Томовски и капитенот Кузмановски, Македонија направи серија од 3-0 и израмни на 26-26 на пет минути до крајот. Се влезе во драматична завршница. При резултат 27-28, по ВАР-преглед, досуден беше седум метри за Македонија и исклучување за Португалија – Кузмановски беше прецизен за 28-28.
На две минути до крајот Велковски погоди за 29-29. Португалија го имаше последниот напад, Томовски запиша две клучни одбрани, но Македонија не успеа да реализира контранапад. На крајот – реми, резултат што остава надеж, но и многу дилеми пред последниот натпревар во групата.
МОЖЕБИ ЌЕ ВЕ ИНТЕРЕСИРА:
