Општина Гази Баба најавува интензивно работно лето со реализација на повеќе од 60 инфраструктурни и развојни проекти, насочени кон подобрување на условите за живот на жителите.
Градоначалникот Бобан Стефковски соопшти дека во наредните денови ќе биде пуштена во употреба новата детска градинка „Кокиче“ во Трубарево, додека со засилено темпо продолжува изградбата на нови градинки во Инџиково, на локацијата меѓу Маџари и Ќерамидница и во Сингелиќ.
Во комуналната инфраструктура се предвидени повеќе значајни зафати, меѓу кои изградба на фекална канализација во Идризово, Јурумлери, населбата Гоце Делчев и Чукур Маало, како и реализација на канали за одводнување во Стајковци и Сингелиќ.
Продолжуваат и инвестициите во образованието преку изградба на новото училиште „Крсте Мисирков“ во Ченто, доградба на ООУ „Крум Тошев“, како и градежно-занаетчиски активности во сите основни училишта на територијата на општината. Општината ќе обезбеди и бесплатни училишни униформи за сите ученици, како и финансиска поддршка од 3.000 денари за секое прваче.
Во делот на спортот, најавена е изградба на нови спортски сали во Црешево и Железара, со цел подобрување на условите за спорт и рекреација.
Планирани се и значајни сообраќајни инвестиции, меѓу кои реконструкција и изградба на улиците „519“ во Ќерамидница, „Пехчевска“ во Хиподром и „Жан Жорес“ на потегот од Кино Маџари до надвозникот кон Ченто, како и уредување на повеќе од 20 улици низ целата општина. Во повеќе населени места ќе бидат изградени и нови пешачки патеки.
За подобрување на водоснабдувањето се предвидени нов бунар во Раштак и нова филтер-станица во Булачани, со што ќе се обезбедат поквалитетни и посигурни услуги за жителите.
МОЖЕБИ ЌЕ ВЕ ИНТЕРЕСИРА:
