Демократска унија за интеграција вчера во Градскиот парк во Скопје одбележа 24 години од своето основање. На свеченоста присуствуваа голем број членови, симпатизери и поддржувачи на партијата, како и партиски функционери и поранешни носители на високи државни функции.
Меѓу присутните беа лидерот на ДУИ, Али Ахмети, поранешниот премиер Талат Џафери, поранешниот министер за надворешни работи Бујар Османи, како и поранешниот министер за образование Арбер Адеми.
Во своето обраќање, Ахмети истакна дека ДУИ во изминатите 24 години изградила силна организациска структура и, според него, останала доследна на своите програмски определби.
Тој порача дека партијата продолжува да се залага за еднаквост, демократија и евроинтеграции, нагласувајќи дека од минимална застапеност во институциите успеала значително да го зголеми своето политичко влијание.
Ахмети упати и повик до албанските политички партии за постигнување договор според кој победникот во албанскиот политички блок би ги претставувал Албанците во извршната власт.
Лидерот на ДУИ оцени дека дел од најзначајните политички процеси и достигнувања во државата се поврзани со ангажманот на партијата и изрази уверување дека актуелните предизвици можат да бидат надминати преку единство и заедничко дејствување.
Во рамки на прославата беше пресечена и роденденска торта со логото на партијата и бројот 24, придружена со пораката „24 години достоинство“.
МОЖЕБИ ЌЕ ВЕ ИНТЕРЕСИРА:
