На големиот митинг во Скопје, кандидатот за градоначалник на Град Скопје од редовите на ВМРО-ДПМНЕ, Орце Ѓорѓиевски, ги повика граѓаните масовно да излезат на избори и да гласаат за работа, ред и знаење.
„Добра вечер, мое Скопје! Добра вечер, горд народе мој! Добра вечер, Македонијо! Каква енергија и колку љубов кон нашиот град има овде вечерва!“, истакна Ѓорѓиевски, додавајќи дека градот е уморен од хаос, сообраќаен метеж, нечистотија и празни ветувања.
Тој потенцира дека Скопје не смее да биде место за експерименти и дека градоначалникот мора да има знаење и искуство за управување со буџет од стотици милиони евра, јавни претпријатија и проекти од европските фондови.
Ѓорѓиевски се осврна и на својата работа во општина Кисела Вода, нагласувајќи дека успеал да реализира ветувања за асфалтирање улици, изградба на градинки и паркови, како и заштита на зелените површини. „Ние не ветувавме кули и градови, ветувавме работа. И испорачавме работа!“, порача тој.
Кандидатот најави конкретни решенија за Скопје: одблокирање на клучки и булевари, изградба на нови мостови, проширување на булевари и воведување трета лента на булеварот „Александар Македонски“. Исто така, најави еколошки проекти како трансформација на Вардариште во парк и набавка на нови еколошки автобуси, како и воведување на градски воз на постоечките пруги.
„Ова не е битка за Орце, ова е битка за Скопје! Ова е битка за нашите деца, да растат во град со кој ќе се гордеат, а не од кој ќе сакаат да си заминат“, нагласи Ѓорѓиевски, повикувајќи ги граѓаните да изберат докажани дела наместо празни зборови.
Митингот беше поддржан од лидерот на ВМРО-ДПМНЕ, Христијан Мицковски, и од коалиционите партнери на партијата, а Ѓорѓиевски потенцираше дека како градоначалник ќе соработува со новиот Совет на Град Скопје за напредок на градот.
МОЖЕБИ ЌЕ ВЕ ИНТЕРЕСИРА:
