МЗТ Скопје Аеродром оствари минимална победа на гостувањето кај ТФТ Скопје со 70:69 во натпревар од последното 18. коло во регуларниот дел од домашното кошаркарско првенство. Средбата се одигра во Негорци, а актуелниот шампион со овој триумф го потврди првото место пред почетокот на Суперлигата.
Натпреварот понуди неизвесна борба во текот на сите 40 минути, при што двете екипи наизменично се менуваа во водство. МЗТ подобро го отвори мечот и брзо создаде предност од девет поени (15:6), но ТФТ постепено се врати во игра и до крајот на првото полувреме направи пресврт, заминувајќи на пауза со водство од 33:29.
Во продолжението домаќините ја задржаа контролата и во еден момент стигнаа до двоцифрена предност од 47:37, а подоцна водеа и со 52:42. Во последната четвртина влегоа со предност од шест поени, а во еден момент имаа и водство од 56:48.
Сепак, кошаркарите на МЗТ тогаш одиграа одлична серија и со 17:1 направија голем пресврт, поведувајќи со 65:57. ТФТ не се предаде и успеа постепено да ја намали разликата, па во последната минута резултатот беше израмнет на 69:69.
Домаќините имаа напад за победа, но направија грешка во чекори, со што му дадоа можност на МЗТ за последен напад. Во самиот финиш Ташовски направи фаул на две секунди до крајот, по што Мекјуел Смит го реализираше првото слободно фрлање за водство од 70:69. Второто намерно го промаши, а ТФТ немаше доволно време да организира напад, па МЗТ се радуваше на победата.
По 18 одиграни кола, МЗТ Скопје има 17 победи и еден службен пораз и како лидер ќе влезе во Суперлигата. ТФТ е на втората позиција со учинок од 16 победи и два порази. Следуваат Пелистер со скор 13-5, Куманово, Маџари и Чаир со по 9-9, Тиквеш со 8-10, Работнички со 7-11, Феникс со 6-12, Гостивар со 4-14 и Ангели со 1-17.
МОЖЕБИ ЌЕ ВЕ ИНТЕРЕСИРА:
