Нова германска студија предупредува дека дури и релативно „ограничено“ глобално затоплување од 2°C може да има сериозни последици врз климатските услови ширум светот. Истражувањето покажува дека ваквото зголемување на температурите би можело да доведе до почести и поинтензивни екстремни појави, како што се суши, шумски пожари и обилни поројни дождови.
Со ова се доведува во прашање досегашната претпоставка дека границата од 2°C претставува некаков безбеден праг. Авторите нагласуваат дека и при вакво ниво на затоплување последиците може да бидат многу потешки отколку што претходно се сметало.
Во рамки на анализата, научниците разгледувале не само просечни вредности, туку и пореални, неповолни сценарија. Токму тие укажуваат на зголемен ризик од долготрајни суши, масовни шумски пожари и поинтензивни врнежи, појави кои досега најчесто се поврзуваа со повисоки температурни растови.
Особено ранливи се делови од Соединетите Американски Држави, Европа, Украина и Јужна Америка – региони кои имаат клучна улога во глобалното производство на храна. Продолжените суши во овие области би можеле сериозно да го нарушат снабдувањето и да доведат до пад на приносите.
Студијата дополнително предупредува на зголемен ризик за шумските екосистеми, при што условите за т.н. „време на пожари“ стануваат значително поверојатни дури и при пораст од два степени, што ја зголемува опасноста од големи и тешко контролирани пожари.
Кога станува збор за врнежите, научниците укажуваат на голема неизвесност, но сепак потенцираат дека интензивните поројни дождови би можеле почесто да ги погодуваат урбаните средини, со ризик од ненадејни поплави и значителни штети.
Иако експертите нагласуваат дека станува збор за екстремни сценарија кои не мора нужно да се остварат, тие истакнуваат дека ваквите проекции се важни за правилна проценка на ризиците. Според нив, потпирањето само на просечни климатски показатели може да доведе до потценување на реалните опасности.
Заклучокот од студијата е јасен – дури и зголемување на температурата од 2°C не треба да се смета за безбедна граница, туку како сериозен сигнал за внимателно следење и подготовка за можни последици.
МОЖЕБИ ЌЕ ВЕ ИНТЕРЕСИРА:
