Македонија го пропушти рокот за донесување на новиот Изборен законик во Собранието, кој беше една од обврските во рамките на Реформската агенда, поради што земјата остана без 4,2 милиони евра финансиска поддршка од Европската унија.
Политичките партии во изминатиот период не успеаја да постигнат договор за измените, а најголемите несогласувања се однесуваа на прашањето дали дијаспората треба да добие можност за гласање на изборите.
Од ВМРО-ДПМНЕ ја обвинија опозицијата, односно СДСМ, Левица и ДУИ, дека со блокирањето на законот ја спречиле неговата реализација.
„Стравот од изборен пораз ги натера овие политички партии да се здружат и да блокираат еден од најважните закони. Владата покажа подготвеност за договор и прифаќање на решенија околу кои ќе се постигне консензус, но тие избраа опструкции“, изјави портпаролот на ВМРО-ДПМНЕ, Валентин Манасиевски.
Од коалицијата ВЛЕН посочија дека за Изборниот законик е потребен широк политички договор и нагласија дека биле подготвени за разговори со сите партии.
„Едно од нашите барања е вклучување на дијаспората во гласањето на следните избори. Тоа е став на кој ќе инсистираме и понатаму, бидејќи сметаме дека треба да им се овозможи на иселениците да го остварат своето право на глас“, изјави Дритон Сулејмани од ВЛЕН.
Од СДСМ, пак, оценија дека губењето на 4,2 милиони евра е помал проблем во споредба со, како што велат, последиците од застојот на европските интеграции.
„Не се губат само 4 милиони евра поради Изборниот законик. Се губи стратешката цел, европската перспектива и милијарди евра кои би можеле да дојдат преку европските фондови. Владата ја држи државата во изолација“, изјавија од СДСМ.
Од Левица сметаат дека јавноста се фокусира само на загубените средства од Европската унија, додека се занемарува фактот дека со непроменетиот Изборен законик останува можноста за финансирање на политичко рекламирање со јавни пари.
„Со останувањето на стариот закон, најголемите политички партии ќе продолжат да користат средства за платено политичко рекламирање, вредни околу 10 милиони евра“, велат од Левица.
Изборниот законик беше десеттата обврска што Македонија требаше да ја исполни во рамките на Реформската агенда за користење на средствата од Планот за раст на Европската унија. Поради недонесувањето на законот, земјата остана без предвидените 4,2 милиони евра.
МОЖЕБИ ЌЕ ВЕ ИНТЕРЕСИРА:
