Општина Пробиштип објави три нови јавни повици за субвенционирање на домаќинствата во 2026 година, со цел поттикнување на еколошките навики, заштитата на животната средина и користењето обновливи извори на енергија.
Граѓаните од општината од денеска можат да аплицираат за финансиска поддршка за набавка на инвертер клима уреди, сончеви колектори и велосипеди.
Преку мерката за инвертер клима уреди, Општината обезбедува субвенција за дел од средствата потрошени за купување нов уред во тековната година, со цел замена на старите печки на цврсти и течни горива. Предвидената поддршка изнесува фиксни 10.000 денари по домаќинство.
Втората мерка се однесува на сончеви колектори, односно поддршка за набавка на енергетски ефикасни и еколошки системи за загревање санитарна вода во домовите. И за оваа мерка е предвидена субвенција од 10.000 денари по домаќинство.
Општина Пробиштип продолжува да ги поддржува и здравите животни навики преку мерката за субвенционирање велосипеди. Граѓаните ќе можат да добијат поврат на 40 проценти од вредноста на купениот велосипед, но не повеќе од 4.000 денари.
Од локалната самоуправа информираат дека заинтересираните граѓани можат да ги преземат потребните обрасци, изјави и целосната документација преку официјалните јавни повици.
„Инвестираме во зелена, чиста и модерна општина Пробиштип“, порачаа од Општината, нагласувајќи дека мерките имаат за цел подобрување на животната средина и зголемување на енергетската ефикасност во домаќинствата.
МОЖЕБИ ЌЕ ВЕ ИНТЕРЕСИРА:
