Кошаркарот на Панатинаикос, Кендрик Нан, се наоѓа во завршна фаза од преговорите со Катарската кошаркарска асоцијација и е многу блиску да стане репрезентативец на оваа земја.
Според информациите на грчкиот „Спорт24“, Нан би можел да потпише петгодишен договор вреден околу 30 милиони долари, со што би станал натурализиран играч на репрезентацијата на Катар. Од „СДНА“ наведуваат дека на кошаркарот му била понудена и пониска сума од околу 10 милиони долари, но тој сè уште не донел конечна одлука.
Катар веќе подолго време работи на засилување на националниот тим со играчи со странско потекло, кои рано во кариерата се приклучуваат на нивниот систем. Нан би требало да биде една од клучните фигури во селекцијата, особено со оглед дека земјата ќе биде домаќин на Светското првенство во 2027 година.
Во текот на 2025 година имаше информации дека Нан може да настапува и за Грција, но таа опција наводно ја одбил, а подоцна беше поврзуван и со Турција, што беше демантирано од тренерот на Панатинаикос и селектор на турската репрезентација, Ергин Атаман.
Оваа сезона во Евролигата, Нан имаше просек од 18,3 поени, 2,7 скокови и 3,5 асистенции по натпревар и беше избран во втората најдобра петорка на натпреварувањето. Панатинаикос, пак, доживеа елиминација од Валенсија во четвртфиналето, а моментално се бори за титулата во грчкото првенство против Олимпијакос, кој води со 2:1 во финалната серија. Четвртиот натпревар е закажан за среда во 20 часот.
МОЖЕБИ ЌЕ ВЕ ИНТЕРЕСИРА:
