Европскиот парламент денеска на пленарна седница во Стразбур ќе се изјасни за конечната верзија на извештајот за напредокот на Северна Македонија кон Европската Унија, чиј известувач е Томас Вајц.
Гласањето се одржува во период на зголемени политички тензии меѓу Скопје и Софија, особено по поднесувањето на амандман со кој се предлага бришење на дел од текстот што се однесува на Вториот протокол од Договорот за добрососедство меѓу двете земји.
Само неколку дена по усвојувањето на амандманите во Комитетот за надворешни работи на Европскиот парламент, Вајц предложи дополнителен амандман со кој бара отстранување на ставот 73 од резолуцијата. Доколку предлогот биде прифатен, во извештајот повеќе нема директно да се споменува Вториот протокол меѓу Македонија и Бугарија.
Предлогот предизвика негативни реакции во Бугарија, каде што се оценува како обид за намалување на значењето на обврските што произлегуваат од билатералните договори и европската преговарачка рамка.
Во пресрет на денешното гласање, бугарски претставници повторно ги отворија прашањата поврзани со наводни инциденти насочени кон Бугари и нивен имот во Македонија, посочувајќи и случаи на оштетување и опожарување на возила.
Исходот од гласањето внимателно се следи и во Скопје и во Софија. Иако извештајот на Европскиот парламент нема обврзувачки карактер, тој претставува важен политички показател за напредокот на евроинтегративниот процес и за ставовите на европските институции во однос на отворените прашања меѓу двете соседни држави.
МОЖЕБИ ЌЕ ВЕ ИНТЕРЕСИРА:
