Коалицијата ВРЕДИ вечерва официјално се обедини во единствен политички субјект на Конгресот што се одржа во Скопје, во присуство на околу 850 делегати.
Еден од ко-претседателите на ВРЕДИ и градоначалник на Чаир, Изет Меџити, во своето обраќање истакна дека постојат моменти кога политиката станува неопходност, а не само натпревар, оценувајќи дека земјата има потреба од единство и нов политички пристап.
Тој нагласи дека различни политички структури и искуства се обединиле околу заедничка цел – отворање ново поглавје за Албанците во државата и ставање крај на, како што рече, долг период на стагнација и политички скандали.
Првиот вицепремиер и министер за европски прашања Беким Сали порача дека обединувањето испраќа јасна порака за европска ориентација и политичко единство.
Тој потсети на протестите од пред една деценија во Скопје и оцени дека евроинтеграцијата останува единствениот пат без алтернатива.
Ко-претседателот на ВРЕДИ и градоначалник на Тетово, Билал Касами, изјави дека новата партија има цел да изгради поодговорна, институционална и стабилна политичка култура.
Според него, ВРЕДИ се позиционира како политички субјект од десниот центар, базиран на вредности како семејството, чесната работа, претприемништвото, идентитетот и функционалните институции.
На Конгресот присуствуваше и косовскиот премиер Албин Курти, кој порача дека одржувањето на собирот на Денот на Европа носи силна симболика и потсетува на вредностите врз кои е изградена современа Европа.
Поддршка за новиот политички субјект изразија и претставници од Албанија и Прешево.
МОЖЕБИ ЌЕ ВЕ ИНТЕРЕСИРА:
