Многу возачи веруваат дека алкотестот може да покаже позитивен резултат исклучиво ако претходно консумирале алкохол. Сепак, во одредени ситуации уредот може да регистрира и лажно позитивен резултат, предизвикан од храна која на прв поглед изгледа целосно безопасна.
Таков случај е забележан во Кина, каде што возач бил сопрен од полицијата и тестиран, при што алкотестот покажал вредности над дозволената граница. Иако тој тврдеше дека не пиел алкохол, дополнителната анализа на крвта потврдила дека бил целосно трезен. Подоцнежната проверка покажала дека непосредно пред тестирањето изел голема количина дурјан.
Дурјанот, овошје препознатливо по исклучително силниот мирис, содржи природни шеќери и соединенија кои можат да предизвикаат краткотрајна ферментација во устата и дигестивниот систем. Доколку алкотестирањето се изврши веднаш по негово консумирање, можно е уредот да регистрира привремено присуство на алкохол.
Сличен ефект може да се појави и по јадење ананас или папаја, особено кога овошјето е презреано. Кај бананите и грозјето, ферментацијата во желудникот може да создаде мали количини алкохол, но за да се добие реално позитивен резултат, потребна е исклучително голема количина.
Почеста појава во секојдневието се лебот и колачите, кои содржат квасец. При ферментација, квасецот создава минимални количини алкохол, а доколку тестирањето се изврши веднаш по јадење, можно е да останат траги што алкотестот ќе ги регистрира.
Дополнително, во одредени десерти се користи екстракт од ванила, кој содржи околу 35 проценти алкохол. Иако ефектот е краткотраен и обично исчезнува по петнаесетина минути, непосредно по консумирање може да влијае на резултатот од тестирањето.
Од друга страна, семките од афион не влијаат на алкотестот, но можат да предизвикаат позитивен резултат на тест за дроги, бидејќи природно можат да содржат микроскопски траги од морфиум.
Експертите советуваат, доколку возачот е сигурен дека не консумирал алкохол, а алкотестот покаже спротивно, да побара повторно тестирање или анализа на крвта, која се смета за најпрецизен и најсигурен метод.
МОЖЕБИ ЌЕ ВЕ ИНТЕРЕСИРА:
