Синоќа на полноќ заврши владината мерка – замрзнати цени на определени прехранбени продукти. Денеска вработените во маркетите тргна да лепат нови – повисоки цени под некои производи.
На пример, цените на различни видови на леб од денеска се поскапи од 4 до 6 денари. Тоа значи дека, во просек, поскапувањето се движи околу 10 – 15 отсто.
Во трговските маркети продавачите ни зборуваа дека од денес изутрина добиле долги листи на цени на производи кои ќе треба да се коригираат во текот на денот. Можеше и да се види дека на рафтовите во некои продавници се уште нема вооопшто или има сосема мали количества на брашно и на масло за јадење. Се било испразнето претходните денови кога цените беа пониски.
-Влегов во маркетот за да видам до каде се стигнати новите цените. Не купував ништо, ни прокоментира еден скопјанец, додавајќи дека е загрижен до каде цените би можеле да одат.
При денешната обиколка на неколку маркети што ја направи екипата на „Скопско ехо“ на подрачјето на Кисела Вода, скоро секаде ни потврдија дека утрово добиле поскапени цени и дека некои веќе се истакнати, а некои ќе бидат истакнати во текот на денот – кога ќе постасаат. Во еден од најголемите маркети ни потврдија дека на почетокот на работниот ден добиле листа од околу 2.000 производи чии цени треба да се коригираат.
Во некои маркети имаше масло за јадење и брашно, а во некои не, и очекуваа да добијат. По која цена, ќе се види наскоро.
Граѓаните преку социјалните мрежи бараат поголема совесност и од трговците и од производителите:
-Навистина е криза, се гледа дека растат цените во цела Европа, но нашите трговци и производители не треба тоа да го злоупотребуваат и цените да ги дуваат премногу, е еден од коментарите.
За потсетување, денеска престанува да важи претходната одлука на Владата за замрзнување на цените на основните прехранбени производи што беше донесена на 5 декември минатата година. Од денеска на сила е мерката за замрзнување на маржите на 5 отсто за трговците на големо и 10 отсто во трговијата на мало кај лебот, шеќерот, солта, брашното – тип 400, суровото сончогледово масло и сончогледово масло за јадење, трајното млеко со масленост од 2,8, 3,2 и 3,5 отсто, свежото месо и сувомеснати производи, сирењето и урдата, оризот, јајцата, тестенините, пченицата и овошјето и зеленчукот.