Лидерите на Европската унија ќе можат да ја обноват својата гаранција за идно членство на шесте балкански земји во среда на самитот во Словенија, откако амбасадорите на ЕУ ги надминаа поделбите, соопштија двајца официјални претставници на ЕУ.
По неколку недели несогласување околу формулацијата на декларацијата за самитот во среда на лидерите на ЕУ и Балканот, претставниците од 27 -те држави на ЕУ постигнаа договор за „повторно потврдување … на нивната недвосмислена поддршка за европска перспектива“, рече официјален претставник за Ројтерс.
Агенцијата Ројтерс на 28 септември објави дека ќорсокакот околу декларацијата се гледа како одраз на недостатокот на ентузијазам во главните градови на ЕУ за внесување на Србија, Косово, Босна и Херцеговина, Црна Гора, Албанија и Северна Македонија во блокот.
Друг претставник на ЕУ рече дека иако сега има договор за декларација на самитот, стратегијата на ЕУ за проширување на заедницата југоисточно се соочи со пречки, дури и ако официјално вратата е отворена за оние што ги исполнуваат критериумите за членство.
„Не можам да кажам дека се’ е во ред“, рече официјалниот претставник, истакнувајќи ја неволноста кај некои земји -членки да видат понатамошно проширување на блокот. „Се разбира, има многу прашања, но исто така не можете да кажете дека вратата е затворена.
Државите на ЕУ одбија да ги откријат своите позиции на преговорите за декларацијата на самитот, иако Словенија, која претседава со ЕУ, се обиде да вклучи обврска што блокот ќе ја преземе во шесте балкански држави до 2030 година, според нацртот што го виде Ројтерс.
Вториот претставник на ЕУ рече дека тоа не било успешно.
Богатите северни земји се плашат од повторување на брзото пристапување на Романија и Бугарија во 2007 година и од лошо управуваната миграција на работниците од Источна Европа во Британија, што сврте многу Британци против ЕУ.
Бугарија е против пристапување на Северна Македонија поради јазичен спор, што значи дека дури и со одобрување на декларацијата на самитот, дипломатите не очекуваат напредок наскоро.
