Премиерот Христијан Мицкоски изјави дека Владата и ВМРО-ДПМНЕ се подготвени да прифатат една изборна единица, како и предлозите на Левица за поголемо финансирање на изборните кампањи на помалите партии, доколку тоа овозможи донесување на новиот Изборен законик.
Тој посочи дека на вчерашната средба во Собранието ВМРО-ДПМНЕ повторно го истакнала ставот дека воведувањето на гласање на дијаспората е стратешка цел, но оцени дека дел од политичките партии настапиле со позиции кои, според него, не оставаат простор за постигнување договор.
„Имаше вчера состанок во рамките на Парламентот. Ние како политичка партија јасно дадовме до знаење дека поширокото гласање е наша стратешка цел. Од друга страна, дел од политичките партии излегоа со сосема радикализирани позиции. Едната беше да се гласа со државен консензус, што за нас не е прифатливо. Практично, тоа е позиција со која некој однапред не сака да има договор“, изјави Мицкоски.
Осврнувајќи се на предлозите на Левица и СДСМ, премиерот рече дека ВМРО-ДПМНЕ е подготвена да ги прифати нивните барања доколку тоа придонесе за усвојување на законските измени.
„Нашиот став е јасен. Ако сакаат повеќе пари, добро, нека има помалку за нас, а повеќе за нив. Потоа ќе се согласиме и за една изборна единица. Подготвени сме да ги прифатиме сите барања на СДСМ и нивните коалициски партнери“, нагласи тој.
Мицкоски додаде дека демократијата подразбира носење одлуки со мнозинство, а не со консензус.
„Никој принципиелно не одлучува со консензус, освен во еднопартиски систем. Демократијата значи мнозинството да носи одлуки. Не сме консензуална држава“, рече премиерот.
Тој истакна дека Владата останува на предлогот за воведување гласање по пошта, по примерот на повеќе земји од Европската Унија.
Воедно оцени дека дел од опозициските партии го блокираат донесувањето на Изборниот законик поради, како што рече, страв од пораз на следните парламентарни избори, со што се забавува исполнувањето на реформските обврски на државата.
МОЖЕБИ ЌЕ ВЕ ИНТЕРЕСИРА:
