Со референдумот за укинување на Договорот за добрососедство со Бугарија истовремено да се одржат и предвремените парламентарни избори, побара денеска Христијан Мицкоски, лидер на ВМРО-ДПМНЕ. Тој денеска до Државата изборна комисија ја поднесе иницијатива за референдум за укинување на Договорот за добрососедство, пријателство и соработка со Бугарија од 2017 година. Согласно на одлуката на партискиот Извршен комитет во иницијативата се наведува дека референдумското прашање ќе гласи: Дали сте за напуштање на важноста на Законот за ратификација на Договорот за пријателство, добрососедство и соработка меѓу Република Македонија и Република Бугарија. Постапката треба да почне со собирање 100 потписи за отпочнување на граѓанска иницијатива која потоа ќе биде доставена до Собранието, а со цел овозможување на постапка за собирање на 150 илјади потписи од страна на граѓаните на Македонија. Први на списокот, според Мицкоски, ќе бидат пратениците од ВМРО-ДПМНЕ.
Во изјава за медиумите, Мицкоски повика истовремено со референдумот да се распишат и предвремени парламентарни избори.
-Тоа што почнуваме постапка за распишување на задолжителен референдум за лошиот Договор со Бугарија не значи дека се откажуваме од барањето за предвремени избори. Напротив е одлична можност со референдумот на еден трошок да се организираат и избори, кажа Мицкоски.
Тој ги повика сите политички партии, без разлика на етничка припадност, или оние што се партиски неопределени, сите општествени чинители, невладини организации на обединување.
-Да се обединат семакедонски и да застанат против главниот проблем на нашата европска интеграција. Кога ќе се одржува овој референдум, ќе ги повикувам граѓаните да гласаат „за“ престанок на овој Закон, рече Мицкоски пред медиумите.
За да се распише задолжителен референдум потребно е да се соберат 150.000 потписи, а за да биде успешен треба да излезат да гласаат над 900.000 граѓани.
ДИК во наредниот период треба да ја достави иницијативата до претседателот на Собранието, Талат Џафери, а потоа понатаму да продолжи до двете собраниски комисии – законодавмо-правната и таа за политички систем кои треба да утврдат дали е уредна.
Мицкоски го повика и претседателот Стево Пендаровски да ја почитува иницијативата и јавното мислење.
– Истиот Стево Пендаровски дури сугерираше референдумско изјаснување, па потоа плукаше, но ќе мора да ја почитува волјата на граѓаните кои имаат различно мислење од власта. Од ден на ден Пендаровски го губи достоинството да ја извршува функцијата претседател на сите граѓани, порача претседателот на најголемата опозициска партија.
МОЖЕБИ ЌЕ ВЕ ИНТЕРЕСИРА:
