Министерот за надворешни работи и надворешна трговија, Тимчо Муцунски, денеска присуствуваше на состанокот на шефовите на дипломатија на НАТО, што се одржа во Брисел. На средбата беше разгледана реализацијата на заклучоците од Самитот во Хаг, како и понатамошното јакнење на колективната одбрана и одговорот на актуелните безбедносни ризици.
Муцунски во своето обраќање ја потенцираше неопходноста од стабилен, долгорочен и стратегиски координиран пристап во рамките на Алијансата. Тој ја нагласи и важноста од единство меѓу земјите членки, правична распределба на обврските и континуирана политичка подготвеност за заедничко делување.
Осврнувајќи се на глобалните безбедносни процеси, министeрот истакна дека решението за долготраен мир треба да се бара преку заеднички и воздржан дипломатски ангажман, вклучувајќи го процесот инициран од САД и Украина, со поддршка од партнерските држави.
Тој посочи дека Западен Балкан мора да остане значаен сегмент од агендата на НАТО и ЕУ. Според него, континуираниот и усогласен ангажман на меѓународната заедница е клучен за зачувување на стабилноста во регионот, но и за напредокот на земјите од Балканот кон целосна европска и евроатлантска интеграција.
МОЖЕБИ ЌЕ ВЕ ИНТЕРЕСИРА:
