Министерот за внатрешни работи Панче Тошковски денеска во Полициската академија во Идризово присуствуваше на промоцијата на Каталогот за континуирани обуки на Министерството за внатрешни работи, изработен во соработка со Полициската академија и Мисијата на ОБСЕ во Скопје.
Во своето обраќање, Тошковски истакна дека Каталогот претставува значаен чекор во унапредувањето на професионалниот развој, стручноста и капацитетите на вработените во МВР, нагласувајќи дека современите безбедносни предизвици бараат високо обучена, професионална и ефикасна полиција.
„Континуираната обука и усовршување на полициските службеници претставуваат еден од нашите најважни приоритети. Каталогот не е само преглед на програмите за обука, туку и стратешка алатка за професионален развој, која ќе придонесе за зајакнување на институционалните капацитети, подобрување на квалитетот на полициското работење и дополнително унапредување на довербата на граѓаните во полицијата“, изјави Тошковски.
Тој посочи дека Каталогот содржи систематизиран преглед на програмите за обука, подготвени согласно потребите на полициската служба, современите безбедносни стандарди и најдобрите меѓународни практики. Според него, обуките се насочени кон развој на стручните, оперативните и лидерските компетенции, со посебен акцент на практичната примена на знаењата, почитувањето на човековите права, професионалниот интегритет и етичките стандарди.
Министерот упати благодарност до Полициската академија и до Мисијата на ОБСЕ во Скопје за поддршката и придонесот во подготовката на Каталогот, оценувајќи дека партнерската соработка е важен предуслов за изградба на современ и одржлив систем на полициска обука.
МОЖЕБИ ЌЕ ВЕ ИНТЕРЕСИРА:
