По повеќегодишна пауза и неостварени шанси, Дени Мусовски повторно е актуелен кандидат за настап во македонската фудбалска репрезентација. Неговиот репрезентативен пат беше прекинат пред пет години, кога пандемијата го спречи планираното деби под водство на тогашниот селектор Игор Ангеловски, а подоцна и селекторот Благоја Милевски не го вклучи во своите планови. Сега, со доаѓањето на Гоце Седлоски на селекторската функција, темата повторно е отворена.
На денешната средба со новинарите, претседателот на Фудбалска федерација на Македонија, Масар Омерагиќ, откри дека лично остварил телефонски разговор со Мусовски.
„Разговарав со Дени Мусовски и тој покажа силна желба да игра за Македонија. Двајцата негови родители имаат македонски пасош, така што очекувам процедурата брзо да се заврши и уште во март да биде во комбинација“, изјави Омерагиќ.
Триесетгодишниот напаѓач зад себе има одлична сезона во американската МЛС, во која постигна 14 голови во регуларниот дел и запиша пет асистенции, а додаде и два гола во плејофот. Неговиот клуб, Сиетл Саундерс, заврши на шестото место во Западната конференција и беше елиминиран од Минесота Јунајтед во осминафиналето на плејофот.
Летоска Мусовски настапи и на Светското клупско првенство, а целата професионална кариера ја гради во Соединетите Американски Држави. Освен за Сиетл, во МЛС има настапувано и за Лос Анџелес и Реал Солт Лејк, додека во УСЛ лигите играл за Тусон, Рино 1868 и Лас Вегас Лајтс. Кариерата ја започнал во пониските лиги со Лас Вегас Мобстерс и Берлингем Драгонс.
МОЖЕБИ ЌЕ ВЕ ИНТЕРЕСИРА:
