Полската тенисерка Маја Хвалинска приреди вистинска сензација на овогодинешниот Ролан Гарос, обезбедувајќи пласман во големото финале уште при своето прво учество на престижниот турнир во Париз.
Дваесет и четиригодишната тенисерка во полуфиналето беше подобра од Дијана Шнајдер, славејќи со 2:0 во сетови (7:6, 6:4) по два часа и десет минути игра на централниот терен „Филип Шатрие“.
Првиот сет донесе голема неизвесност и жестока борба, при што двете тенисерки направија по еден брејк. Победникот беше решен во тај-брејк, каде Хвалинска покажа повеќе смиреност и концентрација, што ѝ овозможи да поведе во мечот.
Во вториот сет Полјачката продолжи во ист ритам, успеа двапати да ѝ го одземе сервисот на противничката и сигурно да ја приведе средбата кон крај за најголемата победа во својата досегашна кариера.
Во финалето ќе се сретне со Мира Андреева, која претходно ја елиминира Марта Костјук. За двете тенисерки ова ќе биде прво гренд слем финале во кариерата.
Успехот на Хвалинска добива уште поголемо значење ако се знае дека пред почетокот на турнирот се наоѓаше на 114. место на ВТА-листата. Благодарение на фантастичниот настап во Париз, таа од следната недела ќе направи огромен напредок и за првпат ќе се најде меѓу најдобрите 30 тенисерки во светот.
Со пласманот во финалето, Хвалинска веќе испиша историја, станувајќи првата тенисерка која преку квалификациите успеала да стигне до финалето на Ролан Гарос. На патот до завршниот меч забележа девет победи, а загуби само еден сет, и тоа во третото коло против Марија Сакари.
МОЖЕБИ ЌЕ ВЕ ИНТЕРЕСИРА:
