Кога Кина и САД соработуваат, може да се постигнат големи работи за двете земји и за целиот свет, рече во саботата кинескиот министер за надворешни работи Ванг Ји, предупредувајќи ги оние што сакаат да се одвојат од Кина дека ќе направат „историска грешка“.
Говорејќи на безбедносната конференција во Минхен, Ванг им рече на западните државници, дипломати и воени експерти дека Кина ќе ги брани своите легитимни интереси и права, но и ќе дејствува со чувство на одговорност за историјата, својот народ и целиот свет.
„Сакаме да работиме на подобрување на билатералните односи со САД врз основа на взаемно почитување, мирен соживот и соработка“, рече Ванг.
Зборувајќи за односите со Европа, тој рече дека е „императив“ двете страни да се ослободат од геополитичките и идеолошките одвлекувања.
„Мораме да се гледаме како партнери, а не како ривали“, нагласи тој.
Во однос на Русија, тој рече дека таа е најголемиот копнеен сосед на Кина со кој односите постојано растат на принципите на неконфликт и ненапаѓање на трети страни.
„Тоа и служи на стабилноста во азиско-пацифичкиот регион и во светот“, рече Ванг.
Тој повтори дека Тајван е нераскинлив дел од кинеската територија и дека „тајванските работи се внатрешни работи на Кина“.
„За да се одржи мирот и стабилноста во Тајванскиот теснец, мора да се почитува принципот на една Кина и да се отфрли независноста на Тајван“, нагласи шефот на кинеската дипломатија.