Градоначалникот на Прилеп, Дејан Проданоски, денес присуствуваше на „Quadruple Helix Forum“ во организација на Економскиот факултет – Прилеп, каде што повторно беше нагласена важноста од поврзувањето меѓу академската заедница, бизнис секторот, студентите и локалната самоуправа.
На форумот учествуваа ректорот, деканката, професори, претставници на бизнис заедницата и студенти, кои преку конструктивни идеи и иницијативи укажаа дека токму ваквото вмрежување е темел за јакнење на локалната економија.
Проданоски истакна дека локалната самоуправа работи на градење силен мост меѓу знаењето и неговата практична примена, а Економскиот факултет го оцени како „столб на интелектуалната иднина“ на градот. Според него, секој нов дипломиран студент претставува нова енергија, визија и потенцијал за развој на Прилеп.
Тој нагласи дека неопходно е работодавачите да останат отворени за младите, студентите активно да се вклучуваат во заедницата, а факултетот да продолжи да создава кадар подготвен за современите економски предизвици.
„Само со заеднички напори можеме да создадеме услови младите да останат во Прилеп и да придонесуваат за развојот на градот“, порача Проданоски, додавајќи дека локалната самоуправа останува посветен партнер во оваа соработка.
МОЖЕБИ ЌЕ ВЕ ИНТЕРЕСИРА:
