Американскиот претседател Доналд Трамп повторно упати остра порака до Иран, предупредувајќи дека времето за решение на нуклеарната криза истекува и дека Техеран мора брзо да реагира за да избегне сериозни последици.
„Часовникот отчукува за Иран и подобро е да дејствуваат, и тоа брзо, или нема да остане ништо од нив. Времето е најважно“, напиша Трамп на својата социјална мрежа Трут Соушл, пренесе Ројтерс.
Новата закана доаѓа само неколку часа по разговорот што Трамп го имал со израелскиот премиер Бенјамин Нетанјаху, во период кога тензиите околу иранската нуклеарна програма повторно се зголемуваат.
Во меѓувреме, иранската новинска агенција Фарс објави дека САД доставиле предлог со пет точки до Техеран. Според информациите, меѓу барањата се трансфер на ураниум во Вашингтон и воведување дополнителни ограничувања за иранската нуклеарна програма.
Од иранска страна, пак, тврдат дека Вашингтон одбил да ослободи дел од замрзнатите ирански средства, како и да плати компензација за штетите што Иран ги претрпел за време на конфликтите.
Техеран во својот предлог побарал прекин на воените дејствија на сите фронтови, вклучително и во Либан, што останува една од најчувствителните точки во односите со Израел. Дополнително, Иран побарал и укинување на поморската блокада на иранските пристаништа.
И покрај жестоката реторика, Техеран и европските земји засега не се откажуваат од дипломатските разговори за иднината на иранската нуклеарна програма, а од сите страни се испраќаат пораки дека е потребно да се зачува стабилна атмосфера за продолжување на преговорите.
МОЖЕБИ ЌЕ ВЕ ИНТЕРЕСИРА:
