Денеска во подкастот на Радио Лидер, „Утро со Златев“, гостуваше Шабан Салиу, претседател на Партијата на Демократските сили на Ромите. Тој зборуваше за состојбата на Ромите во Република Македонија, како и за разликите во нивниот живот за време на владеењето на ВМРО-ДПМНЕ, време за кое тој вели дека ним им се случила вистинска ренесанса.
Прашан околу тоа зошто смета дека односот на СДСМ е секогаш дискриминаторски кон Ромската заедница, кога партијата веќе се претставува како носител на концептот „Едно општество за сите“, а генералното мислење е дека спроведувач на тие дискриминаторски политики е одлика на десницата, Салиу одговори дека за време на владеењето на ВМРО-ДПМНЕ кое важи за десна партија, Ромите биле повеќе почитувани и уважувани за разлика од денес.
– Ако гледаме политички и теоретски, да – десничарите имаат поинаков пристап кон малцинствата. Но ќе ви одговорам многу едноставно: За време на владеењето на ВМРО-ДПМНЕ од 2006 до 2016 година, Ромите доживеаја општествена, економска, културна и политичка ренесанса, истакна Салиу, додавајќи неколку факти кои го потврдуваат неговото тврдење.
Салиу наведе дека во периодот од 2006 до 2016, забележан е огромен број на средношколци и студенти запишани во високите и средните училишта, што претставува голем процент на зголемување на образованието кај Ромите.
– Процентот на запишани во образовните институции беше зголемен од 2 на дури 4 отсто, рече Салиу, додавајќи дека тоа се надополнува со огромниот број на вработувања, каде во 2006 во администрацијата Ромите биле само околу 0,7 проценти, а со времето на владеењето на ВМРО-ДПМНЕ, бројката се зголеми на 1,21 отсто од вработените да бидат Роми. Исто така, во Шуто Оризари се изгради средно училиште.
Во политичкиот дел како што вели, Ромите имаа Министер без ресор, Министер во труд и социјала, пратеници Роми, директори на големи институции и претпријатија и слично.
Во културниот дел, додава, беше донесен законот за празниците на Ромите, заедницата беше уважена од владејачката гарнитура, се прогласи 8 април, светски ден на Ромите како неработен ден за сите Роми, кој се празнува во Македонија како државен празник, што не е случај во ниту една друга земја во светот.
– Важно е дека во тој период, се донесоа повеќе општи закони кои беа во смисла на подобрување на состојбата на Ромите и нивното интегрирање во државата и општеството, подвлече Салиу.
Околу СДСМ и нивниот однос кон Ромите, како и тоа каде ја гледаат иднината на актуелната власт во Македонија, Салиу заклучи дека СДСМ е партија која само опаѓа, а прашање на време е кога ќе падне и Владата.
– СДСМ е партија која е во пад. Гледате што се случува, прво со гафовите на премиерот Заев, нема ден кога не се случиле спектакуларни и смешни ситуации во државите. СДСМ покажа дека нема капацитет да управува со државата. Нивните структури, министри и директори, се покажаа како дел од најслаба влада, од најслабо организирана држава во поглед на меѓународната политика, економските политики, присуството на сиромаштијата не само кај Ромите туку и кај сите граѓани. Пред малку се зборуваше за 60.000 невработени. Значи, на секое поле владата на Заев и СДСМ во коалиција со ДУИ, пропаѓа. Тоа се одразува и во Шуто Оризари, луѓето се незадоволни, го нема она што го имаше за време на владеењето на ВМРО-ДПМНЕ, но гласачкото тело ги гледа немилите настани како оние во Битола и Струмица, а за сето тоа ќе добијат казна, истакна Салиу.
Како што вели, со најновиот настан во Струмица, вриеја порталите и невладините организации, но за жал оние кои се во коалиција со СДСМ, се во аут и не реагираа на овој настан како што реагирале од неговата политичка партија. Додава дека Ромите се искусни во поглед на изборите, знаат да казнат, но економската ситуација е таа која партиите ја искористуваат.
Тој заврши, дека се надева на победа на Коалицијата за Обнова на Македонија што побрзо, со цел конечно интегрирање на ромската заедница во општеството. Верува дека Ромите ја увиделе разликата во владеењето последниве четири години и на наредните избори ќе го казнат СДСМ и Зоран Заев.
МОЖЕБИ ЌЕ ВЕ ИНТЕРЕСИРА:
