Вардар на шампионски начин ја заврши сезоната во Првата македонска фудбалска лига, совладувајќи ја Шкендија со 3-0 на арената „Тодор Проески“ пред своите навивачи.
Иако натпреварот немаше резултатско значење, бидејќи двата тима претходно ги обезбедија своите позиции на табелата, дербито донесе динамична игра и неколку возбудливи ситуации. Вардар како шампион ќе настапи во квалификациите за Лигата на шампионите, додека Шкендија како вицешампион ќе игра во Конференциската лига.
Шкендија прва се закани преку Мазари, но голманот Талески одбрани сигурно. Потоа Вардар ја презеде иницијативата и поведе во 20. минута, кога по брза контра топката заврши во сопствената мрежа на Ајетовиќ.
Пред истекот на првото полувреме, Закариќ по асистенција од Цветковиќ зголеми на 2-0.
Во вториот дел Шкендија се обиде да се врати во игра и создаде неколку шанси, но одбраната на Вардар реагираше сигурно, вклучително и интервенции на самата гол-линија. Во 70. минута гостите добија пенал по преглед на ВАР, но голманот Талески го одбрани ударот на Љатифи, а и повторениот обид заврши на ист начин.
Пропуштените шанси беа казнети во финишот, кога Бобан Николов го постигна третиот гол за Вардар и го потврди убедливиот триумф во последниот меч од сезоната.
МОЖЕБИ ЌЕ ВЕ ИНТЕРЕСИРА:
