На свечената академија во Домот на културата „Иљо Антески – Смок“ во Тетово беше одбележан големиот јубилеј – 100 години од формирањето на Планинарскиот клуб „Љуботен“. Настанот се одржа под покровителство на претседателката Гордана Сиљановска-Давкова, која им се обрати на присутните.
Свое обраќање имаа и претседателот на клубот „Љуботен“, Јован Божиноски, како и првиот човек на ФПСМ, Зоран Читкушев.
Во честитката за вековниот јубилеј, Сиљановска-Давкова ја истакна искрената благодарност до сите генерации планинари кои низ годините ја афирмираа љубовта кон Шар Планина и кон природата. Таа го нагласи нивниот придонес во развојот и промоцијата на здравите навики и рекреативниот дух.
Претседателката подвлече дека планинарењето, како спорт и рекреација, значајно влијае врз физичкото и менталното здравје и го јакне карактерот. Според неа, време е државата да ги следи примерите на земјите во кои планинарењето е дел од наставните програми и е широко прифатено како дел од современиот начин на живот.
Публиката имаше можност да ја доживее богатата историја на најстариот македонски планинарски клуб преку документарен филм и мултимедијална изложба поставена во галеријата на Домот на културата.
На крајот од свеченоста, Сиљановска-Давкова, како и повеќе истакнати членови на клубот, заедно со домашни и меѓународни институции и партнерски програми, добија плакети за својот долгогодишен придонес.
МОЖЕБИ ЌЕ ВЕ ИНТЕРЕСИРА:
