Дваесетина ученици и еден наставник од Основното училиште „Невена Георгиева-Дуња“ во скопската општина Кисела Вода побарале лекарска помош по појава на симптоми како гадење, повраќање и дијареја, што отвори сомнежи дали станува збор за труење со храна или за вирусна инфекција.
Според информациите од здравствените установи, околу 15 деца биле прегледани на Детската клиника до вчера. Најголем дел од нив имале лесна клиничка слика и биле пуштени на домашно лекување, додека само едно дете било задржано на болничко лекување, но по стабилизирање на состојбата денеска е пуштено дома.
Од Клиниката за инфективни болести информираат дека биле прегледани четири деца и едно возрасно лице со слични симптоми. Кај ниту еден од пациентите не била утврдена потреба од хоспитализација.
Според првичните епидемиолошки анкети, досега не е утврдена заедничка консумација на храна кај сите заболени, поради што надлежните институции засега не изнесуваат претпоставки за причините, додека траат истрагите и проверките.
Загриженост изразија и родителите, од кои дел наведуваат дека нивните деца биле земени од училиштето поради повраќање и побарале институциите итно да ги утврдат причините за состојбата.
Од Општина Кисела Вода соопштија дека внимателно ја следат ситуацијата и дека учениците кои пријавиле симптоми се од различни возрасни групи. Според првичните информации, тие не консумирале иста храна во текот на денот, а дел од учениците оброците ги имале и надвор од училишниот објект.
Општината додава дека веднаш биле известени Центарот за јавно здравје и Институтот за јавно здравје и дека ќе се постапува согласно нивните препораки.
Сепак, од Центарот за јавно здравје – Скопје и Државниот санитарен и здравствен инспекторат наведуваат дека до моментот на објавување на информацијата случајот не бил официјално пријавен кај нив.
Надлежните институции продолжуваат со проверките со цел да се утврди дали станува збор за труење со храна или за вирусна инфекција.
МОЖЕБИ ЌЕ ВЕ ИНТЕРЕСИРА:
